Parosifa erup fain Yon-ke siisimok

Miimow opora

Parosifa fain Kristen teeria woos mua-ke siisimok. Emeria oko siisimomam naek, nain amis mua unowa-ke maimik, makena o Kristen teeria oko wia naemi naap maek. Parosifa-pa opora feenap maek, wi emeria mua oko wia kookaluk. Ne wi wadol mua opor wadola maimik nain me wia miimuk. Wi mua nain Mua Maneka opora wiar momorimik nain-ke.

2 John

1 Aria parosifa fain yo Yeesus Krais teeria woos mua-ke no yena ekera, nena muuka wiipa onaiya nia siisimomiyem, no eena Mua Maneka nefa pepekimok nain-ke. Yo manek akena nia kookaliyem. Ne me yo yaisow, wi unowiya eena opor makena amisaremik nain pun nia kookalimik. 2 Moram i unowiya opor makena opam-ikaimik, ne opora nain anane naap yiar ikainon.

3 I unowiya feenap yiam maimik, Yeesus Krais opor makena opap yiam kookalem-ikemkun yiena Auwa Mua Maneka, ona Muuka Yeesus Krais ikos yia kemalep yia asipami yia saliwam-ikauk, ne kema sonom eliwa yiem-ikauk.

4 Opor makena ookam-ikowa nain Auwa ona yia maakek. Ne nena muuka wiipa papako ookam-ikaimik. Yo naap wia miimap manek akena kemeliyem. 5 Ne aakisa nefa maakiyem, yo feenap kookaliyem, i unowiya yiam kookalem-ikaikua. Sira nain me enuma-ke, weetak. Iiriw Yeesus Krais opora enum-pariw wiar opamkun sira nain yia maakemik. 6 Yiam kookalowa nain sira makena feenap, i unowiya Mua Maneka opora wiar ookiyen. Ni niam kookalowa sira-pariw ikeka. Nain iiriw Yeesus Krais opora enum-pariw wiar opiwkin sira nain nia maakiwkin miimap ikeman.

7 Wi wadol mua unowa epa unowa ikiwemi wia peeskimem-ikaimik. Yeesus Krais miiwa orok nain miiw mua mia onaiya orok, nain wi makena-ke me naimik. Mua naap maiya nain mua wadola-ke ne Krais iiwua-ke. 8 Nain ni maa urufap, Yeesus Krais opor makena ookami maa eliwa aawowa naep uuwiman nain, oko ni oboserowen. Naapeya ni naap kekanep ikeka. Ne Mua Maneka iiwawun maneka nia kiripominon. 9 No mua Krais opora nomakep nena opora kema-pa imenap main nain Mua Maneka kemena-pa me wiar ikon. Ne no mua Krais opora baliwep wiar opin nain Mua Maneka ne ona Muuka ikos nefamiya ikaimik. 10 Wi wadol mua naap nain oko-ko niar ekapinok-na me aaweka, ne pun kemelow opora me iweka. 11 Mua eena kemelow opora iwinon-na os pun ememiriarep uuwowa epaskun aremi uuwow samora onikuan.

12 Yo opora unow akena efar ikua. Nain parosifa-pa nia maakowa miatiniyem. Yo kookalowa-ke feenap maiyem, yena ikiwep niamiya ikok aakunowa-ke eliw, naeya i unowiya kema eliw manekiw ikaiyen.

13 Nena neepe eena Mua Maneka pepekimok nain, ona muuka wiipa unowa fain-ke ni eliwa ikeka nia naimik.